CEBU, Philippines - Giawhag ni Konsehal Ma. Nida Cabrera ang Philippine Coast Guard (PCG) nga higpitan ang pag- inspeksyon sa mga barko nga mobiyahe gikan dinhi sa Sugbo paingon sa nagkalainlaing destinasyon.
Sumala pa ni Cabrera nga mahinungdanon kaayo ang makanunayon ug walay hunong ang pag-inspeksyon sa mga barko ilabi na karong tingbakasyon ug kusog ang biyahe sa maong mga sakyanan sa kadagatan.
Gihimo ni Cabrera kining maong awhag human siya makadawat og mga report nga adunay ubang mga barko nga kusog kaayo mopahimulos atol sa “peak travel season” diin ang uban niini mopasakay og mga pasahero nga sobra sa ilang kapasidad.
Base sa resolusyon nga napasar sa konseho sa miaging adlaw, nga kinahanglan nga istriktuhon ang pag-implementar ang pagsusi sa mga barko aron malikayan ang aksidente sa kadagatan.
Nasayran nga ang pagpabaya sa mga tawo maoy hinungdan nga adunay trahedya sa kadagatan.
Samtang ang Philippine Span Asia Carrier Corporation (kanhi Sulpicio Lines Inc.) , mipadayag nga motabang usab sila sa kampanya sa kagamhanan sa paglikay sa mga trahedya sa kadagatan.
Nagkanayon ang vice president sa maong kompanya nga si Devin Go nga aduna gyud sila’y mga tawo nga gidestino nga maoy mo-monitor sa mga pasahero aron malikayan ang overloading.
“Dunay mga pasahero nga mohangyo nga mosakay bisan overloading na, busa amo gyud na nga balibaran. Ipaneguro gyud na namo ang seguridad sa mga pasahero. Gusto namo nga luwas ang ilang pagbiyahe,” nagkanayon si Go.
Gihangop ni Go ang City Council gumikan sa pagpasar niini og resolusyon nga nag-awhag sa coast guard nga mohimo og istrikto nga pag-monitor ngadto sa mga shipping company. (BANAT)