Piniriso mieskapo samtang nag-party

CEBU, Philippines - Usa ka piniriso sa Cebu City Jail sa barangay Kalunasan ang misuway og eskapo apan nadakpan dayon atol sa gihimong Christmas party sa maong prisohan sa milabay’ng gabii.

Ang misuway og eskapo mao si Agustin Muñoz, 39, taga Mohon Talisay ug napriso kini sukad pa niadtong 2008 gumikan sa pagamit og ginadiling drugas.

Matud pa ni Jail Officer 1 Catherine Sintos nga nagluto si Muñoz pasado alas-10 sa milabay’ng gabii nga mikatkat sa bintana ug mipadausdos sa pvc pipe.

Apan nakabantay ang mga gwardiya hinungdan nga giisa dayon ang alarma ug gilusad ang hot pursuit, human sa 30-minutos nga ginukdanay tali sa 13 ka jailguards naabtan kini sa sitio Opra, barangay Kalunasan.

Matud pa ni Sintos nga giisip si Muñoz nga “trustee” sa maong prisohan busa mao kini ang gidestino sa pagluto ug nakugang na lang sila sa kalit nga pagsuway niini og eskapo.

Pagkakaron, si Muñoz gibutang sa isolation cell samtang hingpit karon ang pagbantay sa maong prisohan aron dili na mausab ang nahisgutang insidente. (Sanden J. Anadia)

Misa de Gallo sa Talisay gidugok sa mga tawo

Ni Brenda Batuto

Nagsugwak sa mga manimbahay sa Misa de Gallo o Misa sa kaadlawon kagahapon diha sa parokya sa Santo Niño sa barangay Mohon dakbayan sa Talisay nga giselebrar ni Arsobispo Ricardo Cardinal Vidal sa Sugbo nga maoy ika-unom nga Misa de Gallo niining tuiga.

Sa sobra unom ka minutong homiliya ni Vidal nagkanayon kini nga siya maoy usa sa nakapatukod sa nahisgutang parokya sa Santo Niño sa Mohon niadtong tuig 1985 ug gani ang maong parokya nagsaulog na sa ilang Silver Jubilee o ika-25 ka tuig nga kasumaran gikan sa pagtukod niini.

Ang Arsobispo nalipay tungod sa kadaghan sa mga tawo nga misimba ug nagpasalamat kini sa panaghiusa ug pagtinabangay sa mga parokyano uban sa kaparian diha sa parokya.

 Matud ni Vidal nga ang pagtuo sa mga parokyano nagkahingkod na tungod sa nakita niyang nagkadaghan nga mga nanimba.

Ang Arsobispo dunay mga panghinaot ngadto sa mga parokyano nga makat-on unta sa mga pagtulun-an isip sumusunod ug debotos ni Santo Niño. “Dili malalis kining inyong kadaghan, kining inyong kadasig bunga na kini sa inyong buhi nga pagtuo,” ni Vidal pa.

Gihagit ni Vidal ang katawhan sa panag-uliay sa mga kabubut-on sa mga nagkabangi ug sa pagsaksi sa kalinaw pinaagi sa pagsulti sa tinuod ug pagsubay sa mga lagda sa hustisya, sa pagsubay sa sugo sa gugma ug pagtahod sa kagawasan sa usa’g-usa. Brenda Batuto – (BANAT NEWS)