Kanhi BIN suspek sa pagpatay

CEBU, Philippines - Nagtingkagol ang usa ka kanhi sakop sa Talisay City Intelligence Bureau (TCIB) o kanhi Barangay Intelligence Network (BIN) kinsa usa usab sa suspetsado sa kamatayon sa kanhi headguard sa Alfa Executive Homes diha sa barangay Lawaan III, dakbayan sa Talisay.

Ang suspetsado mao si Jolito Labrador, taga sitio Caduldulan, barangay Lawaan III sa nahisgutang siyudad kinsa gidakop nila ni Insp. Hugo Rio Ipong kagahapon sa buntag pinasikad sa search warrant nga giluwatan ni Regional Trial Court Judge Soliver Peras sa Branch 10 tungod sa kalapasan sa Akta Republika 8294 kon “Ilegal Possession of Firearms.

Na-recover sa mga polis gikan kang Labrador ang usa ka kalibre .45 nga pistola, usa ka magazine niini nga dunay upat ka mga buhing bala ug duha ka kabhang sa kalibre .357 nga revolver.

Si Supt. Henry Biñas, hepe sa Talisay City Police Station nga nahinabi sa Banat News kagahapon mibutyag nga duna silay nadawat nga report nga si Labrador ang giingong maoy gisugo og pagpangita og tawo nga mopatay sa kanhi headguard sa nahisgutang subdivision nga si Rolly Rodrigo bugti sa kantidad nga P17 mil.

Apan ang giingong giduol nga tawo ni Labrador nga maoy iyaha untang gi-hire sa pagpatay kang Rodrigo gikatahong mibalibad.

Kahinumduman nga ang pamilya ni Rodrigo mipasangil sa usa ka negosyante ug homeowner sa Alfa Executive Homes nga si Bensing Reguindin nga maoy mipasugo og papatay sa biktima tungod sa personal nga bangi apan ang giingong gisuholan ni Reguindin mitug-an kaniadto sa biktima ug giuli ang kwartang suhol.

Apan ang maong pasangil gihimakak ni Reguindin ug sa gipahigayon niining press conference ngadto sa dakbayan sa Mandaue ang mga abogado niini nagkanayon nga andam silang moatubang sa bisan unsang imbestigasyon.

 Si Labrador kinsa nahinabi sa Banat News kagahapon nagkanayon nga miundang siya isip sakop sa TCIB mga walo na ka buwan ang milabay tungod kay duna siya’y nadawat nga hulga sa mga maldito diha sa ilahang dapit apan nagdumili kini paghatag og pamahayag kabahin sa ulahing pasangil batok kaniya.

Si Biñas nagkanayon usab nga si Labrador gitaktak niya isip sakop sa TCIB tungod kay nagpabadlong kini. Brenda Batuto – (BANAT NEWS)