Gisumbag Namatay

CEBU, Philippines - Patay ang usa ka 27-anyos nga batan-ong lalaki human kini sumbaga makadaghang higayon diha sa tangkugo sa gidudahang sakop sa fraternity sulod sa pasaheroan diha sa dalan N.Bacalso Avenue sa barangay Duljo-Fatima kagahapon sa buntag.

Ang biktima giila sa Homicide Section nga mao si Oyde Basirgo, residente sa sitio Talamban Proper sa barangay Talamban ning dakbayan kinsa nakainom niadtong tungura dihang gikulata.

Base sa gihimong imbestigasyon sa kapolisan, kauban sa biktima si Rolando Bautista, 29, nga iyang silingan gikan pa nag-inom sa Greenbelt sa barangay Mambaling ning dakbayan.

Sumala pa niini luwan sila sa usa ka jeep pasaheroan padulong sa dalan Colon uban sa upat pa ka mga pasaherong kauban sa gikatahapan nga naglakip sa usa ka babaye.

Samtang nagdagan ang pasaheroan giingong nagpunay og kiat ang biktima ug pag-abot sa maong dapit ang mamumuno mipara sa sakyanan ug nanganaog kauban ang babaye ug laing duha ka lalaki. Apan sa wala pa makadagan ang sakyanan kalit nga gilipot sa mamumuno ang biktima ug gisukmag makadaghang higayon ang luyo sa ulo niini ug sa tangkugo hangtud nga kini nalup-og.

Human niini yanong milakaw ang mamumuno kauban ang iyang mga higala palayo sa maong lugar samtang daling gidala ni Bautista ang biktima sa Cebu City Medical Center apan gideklarar kining dead on arrival sa mga doktor. Nagtuo ang kapolisan nga posibleng nasuko ang mamumuno sa biktima gumikan sa kalangas niini diha sulod sa sakyanan ug posibleng nabastos ang kaubang babaye sa grupo hinungdan nga kini gikulata. (BANAT NEWS)