Giluba sa di kontra angol
CEBU, Philippines - Samdan ang usa ka 56 anyos nga lalaki human kini dunggaba sa tawo nga dili niya kaaway didto sa Salvador Extension, sa barangay Labangon ning dakbayan sa Sugbo sa miaging gabii.
Ang biktima giila sa kapolisan nga si Demetrio Tampus, 56, nagpuyo sa nahisgutang lugar, samtang ang suspetsado mao usab si Eduardo Laput, 47, nga taga sitio Lutao-lutao sa mao gihapong barangay.
Si SPO3 Rey Cuyos ug mga kaubanan sa homicide section sa Cebu City Police Office mibutyag nga sa wala pa nahitabo ang pagpanunggab, ang biktima nakig-inom sa iyang anak sa ilang balay.
Apan nigawas kini kay naghatud og pagkaon sa iyang igsuon nga nagpuyo ra usab sa duol sa ilang balay.
Nakurat nalang ang iyang anak dihang nadungog niini ang siyagit og pakitabang sa biktima.
Didto nakita niya nga samdan kini sa buko-buko busa daling gihatod ngadto sa Cebu City Medical Center (CCMC).
Si PO1 Nilo Aventurado sa homicide section nagkanayon nga pulos hubog ang biktima ug ang suspek apan dili kini kauban nga nag-inom niadtong higayona ug dili usab magkaaway.
Hinuon mitahan dayon sa mga otoridad sa kapolisan ang suspetsado ug nagtingkagol na karon sa prisohan. (BANAT NEWS)
- Latest
- Trending
