1 patay 2 angol sa motor

CEBU, Philippines - Usa patay samtang duha ang angol sa aksidente sa kadalanan sa managlahing barangay sa lungsod sa Santander sa miaging adlaw.

Kini sa dihang usa ka lalaki nga nagsakay og motorsiklo namatay human madasmag sa usa ka poste sa dakong signage sa may national highway sa barangay Lilo-an sa nahisgutang lungsod

Ang biktima nailhan nga si Vher Travis Noterte, 21, nga taga barangay Looc sa maong lungsod kinsa nakaangkon og mga samad sa nagkadaiyang bahin sa iyang lawas ug ulo.

Gisuwayan pa og dala sa kapolisan ang biktima ngadto sa Oslob District Hospital diin kini ideklarar nga dead on arrival.

Nasayran sumala sa kapolisan nga ang biktima gikang mitambong og disko sa barangay Canlumacad ug hubog kini nga nagmaneho sa iyang motorsiklo nga adunay plakang 7C-AL-1234.

Nasayran nga ang biktima kusog kaayong nagpadagan sa iyang motorsiklo ug sa iyang pag-abot sa kurbadang bahin sa karsada nawad-an og control ang biktima ug midasmag siya sa poste nga misangpot sa iyang kamatayon.

Human sa maong hitabo nasundan usab kini didto sa barangay Poblacion sa maong lungsod diin duha usab ang naangol nga naglakip sa 4 anyos nga bata dihang natapsingan sila sa usa ka motorsiklo sa may highway sa maong barangay.

Ang 4-anyos nailhan nga si Jomar Estatoy, molupyo sa maong barangay samtang ang driver sa motorsiklo nga nakatapsing nailhan usab nga si Marvin Resalbon, 18, nga taga barangay Bunlan sa maong lungsod.

Base sa inisyal nga imbestigasyon sa kapolisan nasayran nga ang biktima naglakaw daplin sa karsada dihang sa kalit lang nagpabaguros sa iyang motorsiklo si Resalbon ug natapsingan ang biktima ug maayong pagkalagpot niini   sa karsada.

Samtang si Resalbon nga wala makakontrol sa dagan sa iyang motor natumba usab sa karsada busa naangol usab kini.

Ang duha daling gipatambalan sa Oslob District Hospital, samtang nasayran sa kapolisan nga wala diay lisensya si Resalbon nga posibleng mapasakaan og tukmang kaso. (BANAT NEWS)