Katabang gi-gang rape sa upat lalaki

CEBU, Philippines - Usa ka 17-anyos nga katabang ang gitabangan og lugos sa upat ka mga batan-ong lalaki sa sulod sa panimalay sa agalon diha usa sa mga barangay sa lungsod sa Cordova alas-2 pasado ang takna sa miaging kaadlawon.

Giila ni PO3 Rolando Tagsip ang mga nadakpan dayon sa gihimong hot pursuit operation nga gipasanginlang mi-gang rape sa biktima mao sila si Cris Tajanlangit, 20, John Cliford Rossani, 19, Ariel Angco, 18, ug Alimar Aro, 18, mga pulos molupyo sa nahisgutang dapit.

Si PO3 Rolando Tagsip miingon nga ang upat ka mga suspetsado miadto sa panimalay nga gialagaran sa biktima apan wala didto ang ilang gipangitang agalon sa biktima.

Matud pa ni PO3 Tagsip base sa gibutyag sa biktima sa imbestigasyon, tungod kay wala diha ang agalon sa biktima nakigtabi kini ngadto sa upat hangtod nga giagni siya sa grupo nga mag-inom sa usa ka videokihan sa maong dapit.

Dangtan pipila ka oras ang nakalabay nananghid ang biktima nga mopauli apan gikuyogan siya sa upat ug wala magtuong adunay dautang buhaton kaniya ang mga kauban pag-abot sa ilang balay.

Ang biktima nga 17-anyos ang kusganong mipadayag nga gipulipulihan siya sa paglugos sa upat bisan paman sa iyang pagsupak, human sa krimen nanglakaw ang mga suspek samtang midangop sa kapolisan ang biktima.

Matud pa ni PO3 Tagsip nga gitug-an sa biktima ang mga pangalan sa mga suspetsado hinungdan nga dali nilang natultulan ang ilang mga balay ug nangadakpan. Dugang pa ni Tagsip dihang ilang gisukit-sukit ang upat pulos sila mihimakak sa pasangil nga ilang gilugos ang biktima sanglit matud pa nila miuyon kini sa ilang gihimo. (BANAT NEWS)