'Druglord' sa tuburan gironda sa CIDG, PDEA

CEBU, Philippines - Gironda sa hiniusang puwersa sa mga sakop sa Criminal Investigation and Detection Group (CIDG)-7, Philippine Drug Enforcement Agency (PDEA) ug Tuburan Police Station ang panimalay sa usa ka gipasanginlang druglord sa barangay Poblacion lungsod sa Tuburan kagahapon sa hapon.

Si Johnny Ylanan, molupyo sa nahisgutang lugar ikatulo na ka higayon kagahapon nga gironda sa mga awtoridad human gireklamo sa mga opisyales sa barangay lakip na mismo si Mayor Democrito “Aljun” Diamante sa lungsod sa Tuburan.

Ang mga opisyales sa maong lungsod mireklamong daghan na sa ilang mga molupyo ilabi na ang kabataan nga nangabuang tungod sa paggamit og ginadiling drogas nga shabu.

Si Diamante sa interbyu kagahapon sa Balitang Bisdak nagkanayon nga naa sa ikaduhang listahan sa mga drug personalities si Ylanan diha sa ilang lungsod, dugang pa niya nga aduna sad kini laing mga negosyo sama sa bansohan ug talyer nga gituohan niyang posibleng ‘front’lamang.

“Dugay na ni kuno ni siyang nag-negosyo ning bataa. Bisan sa ako niangkon siya nga lima ka tuig na siyang nag-negosyo ani,”matud pang Diamante sa maong report.

Samtang giangkon ni Diamante nga posibleng adunay mga polis sa iyang lungsod nga nangaraan na sa serbisyo ang nasuod na sa mga drug personalities maong dali rang makabantay kun adunay operasyong ilusad ang lokal nga kapolisan. Ang ronda pinasubay sa search warrant nga giisyu ni Judge Soliver Peras sa RTC Branch 10 batok sa suspek tungod sa ilegal nga drugas.

Nakuha nga mga ebidensya sa panimay ni Ylanan ang mga pinaketeng ang sulod gidudahang shabu ug ingon man ang usa ka debomba.

Sa report sa DyLA kagahapon sa hapon si Ylanan nga nahinabi sa tigbalita miangkon nga manindahay siya og shabu apan dili dinagko sanglit hatdan lang siya matag semana sa lungsod sa Tuburan.

Si Diamante midugang nga nakuha sa kapolisan ang daghang mga gidudahang shabu, mga tag-as nga kalibre sa armas ug dakong kantidad sa salapi.

Atol ning pagsulat sa balita walay bisan usa ka opisyal sa PDEA ug sa CIDG-7 nga mikuyog sa maong operasyon ang mitubag sa ilang mga telepono aron unta pagkompirmar sa impormasyong gibutyag ni Diamante.  (BANAT NEWS)