'P100 mil' nga headline gireklamo

CEBU, Philippines - Gumikan sa kabalaka nga masaypang P100 milyones, gumikan sa headline nga “P100 mil ang balor sa nakawat” sa mga kabtangang nasakiyo sa wala hiilhing kawatan gikan sa usa ka balay sa Minglanilla sa miaging adlaw, usa ka tagtungod sa nabiktima mireklamo kagahapon.

Si Cleofe Fernandez kinsa nagpailang taga dakbayan sa Sugbo mibutyag sa Banat News nga nabalaka kaayo ang magtiayong Ted ug Lydia Bacalso sa Deca Homes subdivision sa barangay Tungkil, lungsod sa Minglanilla bahin sa maong headline.

Kini tungod kay matud pa niya, tinuod nga P100,000 ra gyud kapin kun kulang ang balor sa mga alahas, salapi ug uban pang butang ang nakawkaw sa mga kiriwang milungkab sa ilang balay. Apan pamasin nga saypon kini sa pagsabot sa mga Sugboanong dili kaayo makasabot og Binisaya bahin sa mil ug milyon, gikalipay ni Fernandez nga ikapasabot sa Banat News pinaagi sa ininglis nga pulong.

Matud pa niya nga dili sila gustong hisaypan sa mga tawo nga milyonaryo na tungod sa P100 mil nga pulong.

Nasayran nga walay tawo ang balay sa mga biktima dihang gilungkab ang bintana niini sa kawatan ug dihang nakasulod na sa balay gipanguha ang mga alahas, camera ug cash nga mibalor kapin kun kulang P100,000. (BANAT NEWS)