P100 mil balor sa nakawat

CEBU, Philippines - Kapin sa P100 mil ang kantidad sa mga alahas, kuwarta ug uban pang mga butang ang nasakiyo sa wala mailhing kawatan kinsa milungkab sa usa ka balay sa barangay Tungkil, lungsod sa Minglanilla niadtong Sabado sa hapon. Ang mga biktima mao ang magtiayong Ted ug Lydia Bacalso, sa   Deca Homes subdivision sa maong lungsod.

Si PO1 Ablelardo Biton sa Minglanilla Police Station nga nahinabi sa Banat News kagahapon nagkanayon nga nadala sa kawatan ang duha ka mga digital camera nga nagkantidad tanan og P45 mil, mga alahas nga nagkantidad og P30 mil, kwarta nga P50 mil ug N95 nga cellular phone nga nagkantidad og P40 mil.

Matud ni Biton nga atol sa maong hitabo walay tawo ang balay sa mga biktima hinungdan nga ang kawatan nakahigayon og guba sa birha sa bintana sa likod nga bahin sa balay ug gipanangtang ang mga jalousy blade hinungdan nga nakasulod kini sa balay.

Unya gipangukay ang sulod sa balay ug nakuha ang maong mga butang, alahas ug kwarta.

Gipangita pa sa kapolisan ang mga kawatan. (BANAT NEWS)