Prosecutor mi-deny nga nangulata

CEBU, Philippines - Kusganong gihimakak ni Mandaue City Prosecutor Bienvenido Mabanto ang alegasyon sa usa ka Japanese national nga gikulata siya sa maong piskal.

Si Mabanto kinsa mipatawag og press conference kagahapon nagkanayon nga wala gyud niya pasipad-i ang Hapones nga si Tamotsu Miyauchi bisan nalang og kusi sukwahi sa pasangil sa naulahi kaniya nga iyaha kining gikulata hinungdan sa iyang pagkaangol.

“Dili intawon ako ang nikulata ana niya. Kadaku anang tawhana unya mas batan-on pa nako. I am not inclined to engage in physical fight with him,” matud pa ni Mabanto nga nagpangidaron na og 58-anyos.

Si Mabanto mipadayag nga mopasaka siya karong adlawa og kasong physical injuries, malicious mischief ug direct assault batok kang Miyauchi tungod kay siya maoy nabun-og sa maong hitabo.

Matud ni Mabanto, padulong siya sa Mandaue Hall of Justice sa barangay Subangdaku aron unta sugaton ang kaubang piskal aron magdungan sila og pangadto sa Waterfront Hotel, sa Cebu City aron modawat og Award of Recognition gikan kang Department of Justice Secretary Leila de Lima niadtong Biyernes sa hapon dihang nahitabo ang insidente.

Si Mabanto kinsa maoy vice chairman sa Mandaue City's Traffic Management Board sulod na sa kapin sa 20 ka tuig miingon nga walay nahitabong traffic altercation kon panaglalis tali nilang duha tungod lang sa trapiko.

“Stop pa ang traffic lights. Unya kani nga Japanese, nisulod gyud sa tunga bisan gamay kaayo ang lugar then all of the sudden I heard a loud noise kay iya diay gihapak akong awto,” matud pang Mabanto.

Tungod niini mikanaog siya sa sakyanan ug mipaila sa iyang kaugalingon isip piskal ug usa sa mga opisyales sa city traffic apan gikatahong mitubag si Miyauchi nga wala siya’y labot bisan si kinsa pa kini.

Daling gipugngan ni Mabanto ang manobela sa motorsiklo ni Miyauchi aron di kini makaeskapo samtang mitawag siya og polis apan giingong gisinghagan siya sa maong Hapones sa pag-ingon “No police. Always ask money, very bad.”

Samtang sila nagtinubagay giingong nadumbolan siya sa atubangang ligid sa motorsiklo sa Hapones maong natumba siya, tungod niini nagpatabang siya sa mga tawo maong midugok ang mga estambay ug gitabangan siya.

“Pagsulti sa babaye nga tabangi ninyo si sir kay mga Pinoy gud ta. Mao ‘tong panahuna nga gitabangan siya og kulata sa mga tawo,” matud pang Mabanto.

Si Mabanto nasagmuyo sa pamahayag ni Miyauchi ug sa manlalaban niini nga si Ken Grace Mendoza nga gipagawas nga siya maoy dautan sa maong insidente.

Nagmulo si Mabanto sa iyang tikod ug mga tudlo ug panakit sa likod tungod sa iyang pagkatumba.

Mireklamo karon si Misayuchi, 46, tungod sa giingong pagbilanggo kaniya nga walay kasong gipasaka ug ebidensya.Si Misayuchi nakaangkon og daghang pangus ug samad sa likod ug mipasangil nga binuhatan kini ni Mabanto kaniya.

Ang manlalaban ni Misayuchi nga si Mendoza naglaraw sa pagpasaka og serious physical injuries ug illegal arrest batok niadtong mipasipala ug mibilanggo sa iyang kliyente nga wala’y sala.

 “I just want to protect my client and if ever he wants to file a case or not it’s all up to him,” matud pa niini sa igsuong pamantalaan sa Banat News nga The Freeman.

Si Mendoza midugang nga iyahang tabangan si Misayuchi sa pagpasaka og kaso kun mao kini ang buot niining mahitabo apan magkinahanglan siya og Japanese interpreter. (BANAT NEWS)