CEBU, Philippines - Nakigtagbo kang Gobernador Gwendolyn Garcia ang grupo sa mga kababayen-ang negosyante sa South Korea alang sa usa ka paghinigalaay sa miaging adlaw.
Nalipay kaayo ang miyembro sa Korean Women Entrepreneurs Association Gangwon Branch sa South Korea sa gipakitang pag-atiman ni Garcia sa ilang pagbisita sa Kapitolyo nga nakapasurpresa kanila.
Sumala pa ni Garcia ang nasentro ang ilang gihisgutan bahin sa pag-umol sa usa ka sisterhood agreement tali sa lalawigan sa Sugbo ug sa usa ka progresibong probinsya sa South Korea nga mao ang Gangwon.
Matud pa sa gobernadora nga dugay nang nahisgutan ang sisterhood agreement sa lalawigan sa Sugbo ug sa Gangwon niadtong 1998 panahon pa sa pamunuan sa iyang amahang si kanhi gobernador karon 2nd district Cong. Pablo Garcia, apan niini pa tungora hingusgan sa pagpatuman ning maong kasabutan.
Matud pa sa gobernador nga aron mulambo pa ang relasyon sa duha ka probinsiya, iyang ipadayon ang nasugdan nga kasabotan sa iyang amahan nga kanhi gobernador.
Si Garcia mitumbok nga nasibot siya sa pagpatuman sa maong lakang tungod kay ang nagpasiugda niini mao pa ang mga grupo sa mga kababayen-ang mga negosyante sa South Korea.
Mitambong sa maong tigum si Provincial board member Agnes Magpale, ang Cebu Chamber of Commerce and Industry nga gipresentahan ni Melanie Ng, Mandaue Chamber of Commerce and Industry nga gipresentahan usab ni Carmel Salvador ug kauban usab ang mga Sugboanong negosyante, nga naggikan sa nagka lain-laing mga dagkung kompanya sa Sugbo. (BANAT NEWS)