Baligyaana'g pabuto gitumbok

CEBU, Philippines - Ang kagamhanan sa dakbayan sa Lapulapu mitugot nga ang usa ka dalan sa maong dakbayan   maoy mahimong baligyaanan sa mga pabuto gikan sa Disyembre 15 hangtod sa Disyembre 31 sa tungang gabii.

Mao kini ang First Street sa barangay Kalawisan hangtod sa Babag II sa maong dakbayan.

Si SFO1 Atelano Beredo sa buhatan sa kabomberohan sa maong dakbayan mibutyag sa Banat News   nga mokabat sa 120 ka mga manindahay og pabuto ang gihatagan og permiso sa ilang buhatan aron makapaninda og pabuto.

Si SFO1 Beredo miingon nga una sila hatagi og permiso, gipaubos una sila sa usa ka seminar nga nagtudlo kanila bahin sa kasiguroan sa pagpamaligya og pabuto sa maong lugar.

Kini pinaagi sa pagpatuman sa balaod nga ang pagpanigarilyo ug pag-testing og pabuto sa maong lugar higpit nga idili.

Gihatag usab nila ang pagtugot sa pagpahimutang sa mga tindahan 6 metros ang gilay-on sa matag usa niini.

Gipahimangnoan usab ang mga vendor nga mogamit og barel nga puno sa tubig aron pagtubag sa emerhensiyang panginahanglan.

Dugang pa ni SFO1 Beredo nga ilang gidestinohan og fire truck nga mag-patrolya sa maong lugar matag karon ug unya aron pagsanta dayon kun may sunog nga moulbo sa maong lugar.

Si Beredo miingon nga panid-an nila pag-ayo ang mga manindahay aron masuta kun gituman ba ang balaod ug kun mapamatud-ang wala motuman sa mga lagda, dihadiha sakmiton ang ilang mga baligyang pabuto.

Nunot niini ilang gipahimutang ang dakong tarpauline sa maong lugar diin mabasa ang mga pahimangno kalabot sa paggamit, pagpabrika ug pagpamaligya og pabuto. (BANAT NEWS)