CEBU, Philippines - Giklaro sa Department of Trade and Industry (DTI) nga pabiling normal ang presyo sa mga nag-unang palaliton sa kamerkadohan dinhi sa Central Visayas gawas sa asukar taliwala niining nagsingabot nga Pasko ug Bag-ong Tuig.
Matud ni Zaide Bati-on, ang hepe sa Regulatory Division sa DTI-7 nga gihimo nila ang subsob nga pag–monitor sa mga nagkalainlaing baligya sa kamerkadohan dinhi sa rehiyon aron masuta ang presyo niini kun nasubay pa ba sa hustong lagda.
Hinuon gipahunong niya ang iyang mga field inspector sa pagsuroy sa mga nagkalainlaing tindahan sa miaging adlaw aron paglikay nga makadawat og mga pinaskuhang ihatag gikan sa mga negosyante.
Apan gipasalig sa DTI-7 nga silotan nila pinaagi sa pagpabayad og dakong multa kadtong mga mapa-himuslanong negosyante nga ilang masakpan nga magpatuyang og pamahal sa presyo sa mga baligya niini.
Apan nanghunaw ang DTI-7 kabahin sa padayong pagsaka sa presyo karon sa asukar sa kamerkadohan tungod kay matud ni Bation nga ang Sugar Regulatory Administration (SRA) maoy adunay gahum sa pag-monitor niini subay sa nalatid sa balaod.
Giawhag hinuon ni Bation ang publiko nga mosumbong dayon sa ilang buhatan kun adunay mamatikdang mga negosyante nga magpatuyang og pamahal sa ilang mga baligya nunot ning panahon sa holiday season. (BANAT NEWS)