Joavan napasakaan na'g kaso

CEBU, Philippines - Pormal na nga naduso kagahapon sa buntag ang kasong robbery, attempted homicide ug kalapasan sa Akta Republika 9165 kon “Comprehensive Dangerous Drugs Act Law” batok sa sinagop sa mayor sa dakbayan sa Talisay nga si Joavan Fernandez.

Kahinumduman nga si Joavan gipasanginlan ni Raymund Paran, tindero sa usa ka tindahan diha sa Club House sa Vista Grande, habig sa barangay Candulawan nga miti-on kaniya og pusil ug gipabuthan siya niini tungod kay nasuko nga nadugay siya og tunol sa duha ka litrong softdrinks niadtong Huwebes sa hapon.

Gumikan niini ang kapolisan mipahigayon og hot pursuit operation batok kang Joavan ug mi-apply og search warrant ngadto sa korte aron maronda ang Balay Alampoan nga estambayanan niini ug ang sakyanan nga gigamit sa sinagop sa mayor.

Ang kapolisan naka-recover og duha ka paketeng dunay residue sa shabu ug mga shabu paraphernalia gikan sa kwarto ni Joavan nga naa sa basement sa Balay Alampoan.

Sa laing bahin, si Konsehal Danny Caballero kinsa kaalyado sa oposisyon nagkanayon nga ang pagpabadlong ni Joavan nakaapektar dili lang sa mayor ug mga sakop sa konseho sa siyudad kundili tanang Talisaynon.

Matud ni Caballero nga nahinabi sa Banat News nga ang tanang Talisaynon maapil sa kauwaw sa mga pagsaway sa mga tawo nga taga laing lugar kabahin sa pagpabadlong sa sinagop ni Mayor Socrates Fernandez ug gani nasinati na usab niya nga gipangutana kung silang mga sakop sa konseho wala bay lakang nga buhaton aron madesiplina si Joavan.

Apan matud ni Caballero nga ang maong sitwasyon sa pagdisiplina kang Joavan personal nga problema sa mayor isip amahan.

Si Caballero nanghinaot nga si Joavan mag-usab na kini ug maghimo og mga kaayohan nga mahinumduman sa katawhan alang sa iyang amahan kinsa usa usab ka amahan sa siyudad.

Si Bise Mayor Alan Bucao nga nahinabi sa Banat News nagkanayon nga ang maong sitwasyon usa ka personal nga problema apan kinahanglan nga dawaton sa mayor nga dunay problema.

Apan ang maong problema dili masulbad kung dili madawat sa mayor nga problemado ang iyang anak.

Matud usab ni Bucao nga si Kongresista Eduardo Gullas nanawagan na nga ipa-rehab si Joavan.

Si Bucao mipasabot nga ang maong problema personal sa mayor ug dili mapugos ang mayor sa iyang buhaton apan hinuon kung ang Talisay na maoy maapikihan kinahanglan na gyud mapatuman ang balaod.

Kini midugang nga sama sa hepe sa kapolisan sa Talisay City Police Station nga si Supt. Henry Biñas subayon lang gyud ang balaod apan kung ang Korte na maoy mohukom wala na sila’y mahimo.

Kahinumduman nga si Joavan gipasakaan na kini og mga kaso apan kanunay kining makalingkawas tungod kay mabasura man ngadto sa korte ang mga kasong ipasaka batok kaniya human nga ang mga mireklamo dili na mopadayon.

Ug niining uwahing hitabo gihimakak kini gihapon ni Joavan human personal nga mitawag sa Banat News nianang pagkahapon sa adlaw’ng Huwebes ug mipasangil nga garaon ug sakop sa fraternity si Paran ug midako ang ulo samtang kini miingon nga kaniadto paman giinitan na siya sa agalon ni Paran. (BANAT NEWS)