Nadakpan og balik

CEBU, Philippines - Nadakpan pagbalik human sa lima ka adlaw nga manhunt operation sa kapulisan sa siyudad sa Danao ang mieskapong piniriso sa miaging semana niadtong Miyerkules sa gabii diha sa Lowa II Cebu Marine Beach Resort nga nahimutang sa Subabasbas sa dakbayan sa Lapulapu.

Ang nadakpan mao si Ryan Zamora, 27, dihang ang tag-iya sa maong resort nga higala sa iyang amahang si Renato Zamora mao ang nanawag sa kapulisan ug nagpahibalo sa nahimutangan niini.

Si PO3 Arnold Giangan ug ang inahan sa suspek nga si Melva ug igsuon nga kagawad sa barangay nga si Mauren Zamora maoy mitabang sa malinawong pagtahan niini.

Si Ryan nag-atubang og kasong qualified theft sa miaging buwan hinungdan nga siya gibilanggo sa Danao City Police station kansang reklamante mao ra sab ang iyang mga ginikanan.

Si Ryan nieskapo human si SPO3 Quirino Vasquez mitugot kaniya nga maglabay og basura sa gawas sa police station apan kalit lang midagan ug misakay sa nagpaabot nang daan nga kaubang dunay motorsiklo nga si Lyndon Casas.

Nadakpan man tuod si Zamora, apan si Vasquez nag-atubang karun og kaso ngadto sa City Prosecutors Office sa dakbayan sa Danao tungod sa maong hitabo. Nasuta nga gilaay ang suspek diha sa bilanggoan sukad nga kini gipapriso sa iyang mga kabanay. (BANAT NEWS)