Gikang nanisko namatay sa dalan

CEBU, Philippines - Usa ka tawong nanisko wala na makauli nga buhi sa ilang balay human kini makabsi sa kinabuhi sa dalan didto sa sitio Basak Eskuwelahan sa barangay Basak, dakbayan sa Lapulapu kagahapon sayo sa buntag.

Si PO3 Dioscoro Arong sa homicide section sa kapolisan sa maong dakbayan miila sa namatay nga mao si Olimpio Genares, 50, ug molupyo sa maong lugar.

Matud pa ni PO3 Arong nga nahinabi sa Banat News nga gikan pa nga mitambong og disco sa maong lugar si Genares unya may gikainom kuno kini sa sulod sa diskohan, apan mipauli kining nag-inusara.

Unya usa sa iyang mga silingan nga si Edwin Delima nakurat nalang sa dihang pag-agi niya sa dalan nga ilang agianan, maoy iyang nakita si Genares nga nagbuy-od sa dalan nga wala nay kinabuhi.

Unya dihang miabot ang kapolisan, gisusi nila ang lawas ug namatud-an nga wala kini timailhan nga gituyo sa pagpatay.

Apan giawhag ni Arong ang mga tagtungod nga ipa-autopsy ang iyang patay’ng lawas aron masuta kun gituyo ba o wala ang pagkamatay niini. – BANAT NEWS