Natulog nga busog tipi
CEBU, Philippines - Patay ang usa ka lalaki human kini matulog nga busog diha sa Marian Village, sa sitio Sun-ok, barangay Tayud, Consolacion kagahapon pasado alas 6:20 sa kabuntagon.
Ang biktima giila nga si Joseph Gumaod, 20, lumad nga taga Surigao Del Norte.
Sa pasiunang imbestigasyon sa kapulisan sa Consolacion, urom maoy gikamatyan ni Gumaod tungod kay natulog kini’g diretso human mokaon og daghan gikan buntag hangtod sa gabii kaniadtong Martes.
Ang mga higala ni Gumaod nga kauban niya sa lawak nga gi-abangan mibutyag nga adunay birthday party nga gitambongan si Gumaod niadtong Lunes ug gipadad-an kini’g sobra nga lechon baboy ug uban pang sud-an.
Dugang pa nila nga pwerteng kaon ni Gumaod sa maong mga pagkaon tibuok adlaw’ng Martes ug wala kini moundang bisan pagtan-aw nila nga busog na kini kaayo.
Matud pa sa mga polis nga dihang gibadlong si Gumaod sa mga kauban sa balay mitubag pa kini og “bahala na’g mamatay basta busog lang!”
Ang igsuong babaye ni Gumaod nga si Marilyn Gumaod ang unang nakadiskubre sa patay’ng lawas sa igsuon human kini wala na motubag sa dihang gitawag kini sulod sa iyahang lawak. - Kristel Cordero ug Monnahlie Olandria (BANAT NEWS)
- Latest
- Trending
