P500 mil nga ayuda gitunol kang Loot

CEBU, Philippines - Pormal nang nadawat ni Daanbantayan Mayor Maria Luisa Loot ang tunga sa milyon ka pesos nga hinabang sa kagamhanan sa dakbayan sa Sugbo alang sa milabay’ng Haladaya Festival sa maong lungsod niadtong miaging bulan sa Agosto ning tuiga.

Si Loot kauban ang iyang mga sakop sa konseho maoy nangunay pagdawat sa tseke nga mobalor og P500 mil nga personal nga gitunol ni Cebu City Mayor Michael Rama sa City Hall kagahapon sa alas 11:00 sa buntag.

Nunot niini gipadayag ni Loot nga mosalmot usab ang lungsod sa Daanbantayan sa Sinulog sunod tuig agi og bawos nila sa kaayo sa dakbayan nga mitabang kanila sa panahon sa ilang pagpanginahanglan ug labaw sa tanan halad usab nila kini ngadto ni Senior Sto. Niño.

Gipasabot ni Loot nga dugay ra unta silang gipahibawo nga mahimo na nilang kuhaon ang gisaad nga ayuda sa siyudad apan tungod sa mga kakulian sa milabay’ng barangay elections ug uban pang kalihukan wala dayun nila kini ma-followup.

Gitandi ni Loot ang dakbayan sa Sugbo ubos sa pagdumala ni Rama ngadto sa lalawigan pinangulohan ni Gob. Gwendolyn Garcia nga mohatag ug P300 mil nga ayuda apan ‘daghan pang yawyaw.’ Ang pagpangayo og ayuda ni Loot alang sa Haladaya Festival sa lalawigan maoy nakapadaku sa ilang panagbangi human masuko si Garcia kay wala kini mo-apil sa milabay’ng Pasigarbo sa Sugbo nga gipasiugdahan sa Kapitolyo. – BANAT NEWS