3 bata nadasmag usa namatay

CEBU, Philippines - Patay ang 16-anyos nga batan-on ug kritikal ang laing duha ka minor de edad niining kauban human mobangga ang gisakyan nilang motorsiklo sa nag-parking nga Tamaraw FX sa highway sa barangay Clavera lungsod sa Borbon niadtong Lunes sa alas 11:00 sa gabii.

Ang patay nang nadangat sa tambalanan mao ang drayber sa motorsiklo nga si Wendell Densing, 16, molupyo sa barangay Goyong samtang kritikal ang duha ka angkas niini nga sila si Kir Flores, 16, ug Fransua Solon, 12, pulos mga molupyo sa nahisgutang lugar.

Samtang ang drayber sa Tamaraw FX mao si Rolando Ogsang, 38, molupyo sa Humayhomay siyudad sa Lapulapu kinsa giimbestigar pa sa kapolisan kun aduna ba kini tulobagon.

Matud ni PO1 Raymund Pepito sa Borbon Police dihang nahinabi sa Banat News subay sa imbestigasyon ang mga biktima paingon sa siyudad sa Sugbo samtang ang Tamaraw FX nag-parking kay naguba ug giayo sa drayber nga paingon gihapon sa siyudad ang direksiyon.

Gihulagway nga wala makabantay ang mga biktima tungod usab sa kangitngit sa panahon ug aksidente kining nabangga sa maong sakyanan ug tungod sa kakusog sa dagan sa motor milupad kini ug nangalabay ang mga sakay niini apil na ang drayber nga nadasok.

Ang tulo pulos nakaangkon og mga kadaut sa kalawasan ug ulo kay wala magsul-ob og helmet ug daling gidala sa Juan Dosado Hospital sa lungsod sa Sogod ang mga biktima apan gireklarar nga dead on arrival si Densing samtang gibalhin og tambalanan sa dakbayan sa Sugbo ang duha ka nangaangol. – BANAT NEWS