Ulitawo gitangkugo pagpusil angol

CEBU, Philippines - Talandugon ang kahimtang sa usa ka ulitawo human pusila ang tangkugo niini didto sa barangay Nug-as, lungsod sa Alcoy sa miaging hapon.

Ang biktima mao si Venerando Carongay, 18, mulopyo usab sa nahisgutang dapit.

Matud sa iyang mga kauban nga nahuman na sa pagduwa og basketball ang biktima dihang kalit lang mitungha ang wala hiilhing kriminal nga nagsakay og motorsiklo ug gipusil ang tangkugo niini diin ang bala milapos sa iyang nawong.

Ang biktima gihatod dayon ngadto sa Vicente Sotto Memorial Medical Center sa dakbayan sa Sugbo, samtang padayon pang gipangita sa kapolisan ang kriminal.

Gituohan sa mga otoridad nga atraso ang hinungdan sa maong pagpamusil. – BANAT NEWS