Nagselos busa naghiko'g

CEBU, Philippines - Gumikan sa sobrang selos, usa ka babaye ang naghikog   didto sa Sitio Lawis, Brgy. Jugan Consolacion, ning lalawigan sa Sugbo sa miaging kaadlawon.

Ang naghunos sa kinabuhi giila nga si Ester Abadiano, 52 , lumad nga taga Brgy. Mambaling, dakbayan sa Sugbo.

Giingon nga lima pa ka buwan nagtipon si Abadiano ug ang iyang kapuyo nga si Reynaldo Canonigo, 34 , nga taga lungsod sa Balamban.

.Matud pa ni PO1 Fritz Devibar nga sa wala pa maghikog si Abadiano, nakit-an pa kini ni Reinel Canonigo, 12, nga anak ni Canonigo nga nag inom sulod sa ilang balay.

Unya giingong si Abadiano nangasaba sa maong bata, busa migawas ang naulahi ug miadto sa iyang amahan nga si Canonigo nga nag-istambay sa gawas.

Unya sa pagka-alas 12:00 pasado sa tungang-gabii, misulod si Reinel sa ilang balay aron matulog, dihang nakit-an niya nga nagbitay na ang iyang ina-ina sa ilang sagbayan nga wala na’y kinabuhi sulod sa ilang lawak.

Ang kapolisan dali kaayong nakasakwat sa lawas sa naghikog ngadto sa Eversley Hospital diin kini gideklarar nga dead on arrival.

Gibutyag ni Reynaldo nga selosa kaayo si Abadiano ug kada lihok niya gibantayan niini.

Hinuon gipamatud-an sa kapolisan nga wala patya og tuyo si Abadiano kay wala silay nakitang bun-og ug samad sa lawas niini gawas sa liog nga natuyok sa pisi nga gibitik niini.   (BANAT NEWS)