Naeskapohan manubag

CEBU, Philippines - Mohimo og linaing imbestigasyon si Cebu Provincial Police Office director Erson Digal labot sa nahitabong pag-eskapo sa miaging Biyernes sa gabii sa usa ka binilanggo sa Danao City jail.

Si Digal mimando sa hepe sa Provincial Investigation Branch (PIB) nga si Senior Inspector Rubin Cuizon sa paghimo og kaugalingong imbestigasyon ug pagtabang sa kapolisan sa Danao sa paghimo og operasyon pagpangita sa mieskapong si Ryan Zamora, 27.

Si Digal miingon nga dili paigo ang katarungang ‘gisugo-sugo’ lang si Zamora tungod kay kinahanglang iyaha kining mapamatud-an sa ilang himuong imbestigasyon pagtino kun angayan bang manubag si SPO4 Quirino Vasquez.

Si Zamora, nga taga barangay Looc giingong gisugo pagpanglimpiyo sa presinto ug paglabay og basura samtang gibantayan sa jailer nga si Vasquez. Apan tungod kay nadistansya si Vasquez kang Zamora mikaratel og dagan ang naulahi padulong sa nagpaabot nga motorsiklong gimaneho sa usa ka Carlito Barriga diha sa gawas dayong misibat.

Sa karatol sa duha naigo nila ang gutter ug nangatumba ug naapsan ni Vasquez apan human sa linayugay nakaipsot gyud ang duha. Wala hinuon mobutyag ang kapolisan kun sinabutan nang daan nila ni Zamora ug Barriga ang pag-eskapo tungod kay natayming pud nga diha nagpaabot ang naulahi sa gawas.

Hinuon gipaniguro sa hepe sa Danao Police Station nga si Chief Insp. Eddie Recamora ang papasaka og kasong infidelity in the custody of prisoners batok kang SPO3 Vasquez agi og pagdisiplina. (BANAT)