Caravan sa kalusugan gilusad sa Pasil

CEBU, Philippines - Usa ka feeding program nga gitawag og “Caravan sa Kalusugan” sa Villar Foundation Inc. inabagan sa Local Government Unit kon LGU diha sa barangay Suba ug barangay Pasil ning dakbayan sa Sugbo kagahapon pasado alas-9 sa buntag ug alas-5 sa hapon.

Ang maong kalihukan kabahin sa “corporate social responsibility” sa organisasyon sa maong tumong motabang sa mga kabos pinaagi sa pagpanghatag og libre nga pagkaon ngadto sa mga kabatan-onan sa maong mga barangay.

Ang programang pagpakaon gipahigayon ngadto sa sports complex sa duha ka mga barangay ug gibahin sa makaduha aron maapud-apod ngadto sa tanang mga molupyo.

Ang unang sesyon nagsugod alas 9:00 sa buntag didto sa Suba Sports Complex pinangulohan ni barangay kapitan Roger Resurrecion.

Matud pa ni Resurrecion nga kapin sa 550 ka mga bata ang nakabenepisyo sa maong programa.

Giklaro ni Resurrecion nga dili pamolitika ang iyang tinguha kung dili kaayuhan para sa iyang mga konstituwente.

Dugang pa niya nga gidawat niya ang imbitasyon sa maong grupo tungod kay wala kini bahid sa politika.

Ang ikaduhang bahin sa programa pasado alas 5:00 sa hapon didto sa Pasil Sports Complex pinangulohan ni barangay kapitan Jocelyn Almacen.

Mao kini ang unang higayon nga mihatag og feeding program ang Villar Foundation pagkahuman sa May 2010 eleksyon diri sa Sugbo ug gikatakda nga mopahigayon pa og lain pa nga susamang programa ngadto sa laing dapit sa sunod tuig. (BANAT NEWS)