Polis nahinanok pagkatulog gikawatan

CEBU, Philippines - Nahanaw ang salapi, mga alahas ug mahalong mga butang sa usa ka retiradong polis human sak-a sa wala hiilhing kawatan ang ilang balay sa barangay Ibabao, lungsod sa Cordova sa miaging gabii.

Ang biktima mao si Retired SPO4 Edward Roquero, 57, minyo nga nagpuyo sa maong dapit.

Si SPO1 Llovero Agosto sa kapolisan sa nahisgotang lungsod nga nahinabi sa Banat News miingon nga nakasulod ang mga kawatan sa balay sa biktima pinaagi sa ilang terrace.

Nasakiyo sa mga kawatan gikan kang SPO4 Raquero ang tulo ka mahalon nga cellphone, P3,000 nga cash, duha ka gold necklace ug upat ka karton nga sigarilyo.

Dugang pa ni SPO1 Agosto nga nahinanok sa pagkatulog ang tanang sakop sa pamilya ni SPO4 Roquero ug walay nakamatikod sa pagsulod sa mga kawatan hinungdan nga sayon ra kaayong gipupho niini ang nahisgutang mga butang.

Si SPO1 Agosto miingon nga nakurat na lamang ang biktima ug ang iyang pamilya dihang sa ilang pagmata sayo sa buntag maoy ilang nakita ang nagkatag nga mga butang sa ilang hawanan. (BANAT NEWS)