13 sakong pabuto nasakmit

CEBU, Philippines - Moabot sa 13 ka sako nga mga pabuto nga gibanabanang mokantidad og P30 mil ang nasakmit sa kapulisan ug mga sakop sa Bantay Dagat sa kadagatan sa Poblacion lungsod sa Cordova kagahapon sa alas 2:00 sa kaadlawon nga gikarga sa usa ka pumpboat ug dad-on unta didto sa lalawigan sa Bohol.

Matud ni PO2 Alex Noron sa Cordova Police Station dihang nahinabi sa Banat News ang maong mga sinako nga pabuto gikompra gikan sa barangay Babag siyudad sa Lapulapu ug dad-on paingon sa Tagbilaran city sa Bohol.

Kini gikarga sa pumpboat nga gipanag-iya sa usa ka Reynaldo Lumansac, molupyo sa Bohol nga maoy nangunay og operate sa maong pumpboat kauban ang laing upat ka mga tawo.

Matud ni PO2 Noron nakadawat sila og impormasyon kabahin sa gitakdang pag-transport sa maong mga sinakong pabuto gikan gipalit sa Lapulapu ug dad-on sa Bohol nga way permit.

Kini maoy hinungdan nga gipahigayon dayon ang operasyon ug miresulta sa pagkasakop kanila.

Gisakmit ang maong mga pabuto nga moabot og 13 ka sako apan gibuhian sila si Lumasac ug mga kaubanan niini tungod kay igo lang gisakmit ang mga pabuto tungod kay way permit.

Nasayran nga ang lalawigan sa Bohol sagad anha magkomprahan og mga pabuto sa Babag, Lapulapu ilabina kun maghinangat ang Pasko ngadto na pagsugat sa Bag-ong Tuig. (BANAT NEWS)