Eskapo ug polis nagsumbagay

CEBU, Philippines - Mag-atubang og kasong administratiba ang usa ka polis sa Danao human maeskapohi sa iyang gibantayang piniriso nga iyahang gisugo pagpanglimpyo sa presinto sa miaging gabii.

Ang gibalhog sa detention cell mao si SPO3 Quirino Vasquez nga nadestino isip jailers sa detention cell sa Danao City Police Station ug ang nakaeskapo nga bilanggo mao si Ryan Zamora, taga barangay Looc sa maong dakbayan kinsa nag-atubang og kasong pagpangawat.

Si PO2 Marlon Remollo sa Danao Police Station nga naghinabi sa Banat News miingon nga si Vasquez gimandoan sa ilang hepe nga si Chief Inspector Eddie Fe Recamora nga maoy ibalhog sa karsel niadtong milabay’ng gabii tungod sa pag-eskapo ni Zamora.

Apan tungod sa pagsaka sa blood-pressure niini kagahapon giingong gipagawas lang si Vasquez sa karsel apan gidid-an kining makauli sa presinto.

Matud pa ni Remollo gipalimpiyo ni Vasquez si Zamora diha sa gawas nga bahin sa ilang detention cell apan sa dihang gitapok na niini ang basura mikaratil kini og dagan paingon sa usa ka lalaki nga nagsakay og motorsiklo nga naghuwat sa gawas sa maong prisohan.

Abtik nga misakay si Zamora sa maong motorsiklo ug paspas nga midagan pahilayo sa maong dapit apan pipila ka metros palang ang gidagan sa motorsiklo natumba kini hinungdan nga daling gigukod ni Vasquez.

Apan dihang gikuptan na ni Vasquez si Zamora sumala pang Remollo mikisi-kisi kini nga miresulta sa linayugay ug sinukmagay sa polis ug sa bilanggo apan tungod sa pangidaron gilupig ang nahauna.

Ang kapolisan padayon pang nangita kang Zamora samtang mag-atubang og kasong administratiba si Vasquez tungod sa nahitabo. (Uban sa report nila ni Kristel Cordero ug Monnahlie Olandria, SWU) (BANAT NEWS)