Liston sa sapatos gigamit paghikog

CEBU, Philippines - Usa ka lalaki ang napalgang nagbitay sulod sa iyang lawak gamit ang liston sa sapatos nga gihikot sa iyang liog diha sa sitio Lower Villa Zakate sa barangay Basak-Pardo ning dakbayan sa milabay’ng gabii.

Ang namatay giilang si Bombi Mamolo, 42, usa ka construction worker kinsa nadiskubrehan sa iyang 18-anyos nga anak nga si Kayehero nga wala nay kinabuhi.

Sa imbestigasyon sa Homicide Section sa Cebu City Police Office si Mamolo gisuwayan pa unta og salbar sa mga sakop sa Basak-Pardo Rescue Unit human kini badbari sa liston diha sa iyang liog apan wala na kini magginhawa pa.

Si Mamolo sumala pang PO2 Jodan Batucan sa pakighinabi sa Banat News hubog nianang uwahing nakit-ang buhi gikan sa gawas ug sa kahadlok sa iyang asawa ug anak nga magkagubot sila ilaha kining gibiyaan.

Giingong manapat si Mamolo panahon nga kini mahubog base sa nakuhang kasayuran sa kapolisan diha sa mga silingan niini.

Apan matud pa mibahad si Mamolo ngadto sa iyang pamilya nga kun molakaw sila maghikog gyud kini. Dugang pang Batucan nga kaniadto paman matag mahubog si Mamolo magpunay kini og suway og hikog apan mabantayan kanunay sa mga silingan ug mabadlong. – BANAT NEWS