Talisay kuyaw sa landslide

CEBU, Philippines - Ang kagamhanan sa dakbayan sa Talisay nabalaka nga mahitabo usab ang pagdahili sa yuta sa maong dakbayan sama sa nahitabo didto sa dakbayan sa Naga diin 12 ka balay ang natabunan sa yuta sa miaging adlaw.

Si Talisay City Administrator Richel Bacaltos nga nahinabi sa Banat News kagahapon nagkanayon nga niining sunod-sunod nga bunok sa uwan gikabalak-an nilang modahili usab ang yuta sa bukirang barangay sa siyudad.

Ang Talisay daan gihimadlan sa Department of Environment and Natural Resources (DENR) nga landslide prone area o lugar nga dahiilanan og yuta.

Gani duha sa mga lugar niini mao ang barangay Manipis ug barangay Lagtang nga nakasinati og pagdahili sa yuta sa miaging tuig.

Matud ni Bacaltos nga dili lamang mga barangay sa bukid ang ilang gibantayan kundi bisan ang mga kabaybayonang lugar gipasidan-an usab nila ang katawhan ilabi na sa kagabhion aron malikayan ang disgrasya.

Ang mga kapitan sa siyudad gikatakdang tigomon aron mapahimangnoan nga ipaandam ang mga tunghaan sa ilang mga barangay nga himuong temporaryong kapuy-an o ka bakwitan sa mga residente kung ugaling dunay mga insidenteng mahitabo nga gama sa kinaiyahan.

Ang Talisay gilangkuban sa 22 ka barangay diin ang mga bukirang barangay niini naglakip sa Manipis, Camp 4, Tapul, Jaclupan ug Maghaway.

Samtang ang mga coastal barangay mao ang Tanke, Dumlog, Poblacion ug Pooc.

Sa milabay’ng tuig ubay-ubay ang nawad-an og pinuy-anan sa sitio Litmon, barangay Dumlog ug barangay Poblacion human kini ibanlas sa dagkong bawod.

Apan karong may dike na ang Litmon, wala nay kabalaka ang mga molupyo kay may depensa naman ang ilang balay batok sa mga   dagkong bawod sa dagat. – BANAT NEWS