Fish vendor nag-sideline og druga

CEBU, Philippines - Usa ka bayong –bayong nga fish vendor kinsa nag–sideline og pamaligya og marijuana sa lungsod sa Consolacion, nasikop sa kapolisan sulod sa merkado publiko sa maong lungsod sa miaging adlaw.

Si PO3 Cecilio Meñoza sa Consolacion Police Station mibutyag sa Banat News nga nasikop nila ang 17 anyos nga bayong-bayong atol sa ilang pagronda sulod sa merkado.

 Nasakmit usab nila gikan sa dinakpan ang tulo ka linikit nga marijuana.

Matud pa ni PO3 Meñoza nga miadto sila sa merkado   human nila madawat ang reklamo sa katawhan kalabot sa paghitak sa illegal nga drugas diha sa merkado.

Miingon si PO3 Menoza nga nasuta nila kini dihang naabtan nila ang grupo sa mga batan-on sulod sa merkado ug nag-iyahay sa pagpanagan dihang nakita niini ang kapolisan nga mironda sa maong lugar.

Apan ang nasikop nilang bayong –bayong mitiurok ug wala dayon kalihok gumikan sa kahadlok, giingong tindero og isda apan nag-sideline pagpamaligya og marijuana.

Sa pagkakaron gipaubos na sa pag-atiman sa social services department ang maong batan-on.  – BANAT NEWS