Cortes mopili na'g hepe

CEBU, Philippines - Gipaabot karon ang hukom ni Mayor Jonas Cortes sa dakbayan sa Mandaue bahin sa pilion niyang permamenteng direktor sa Mandaue City Police Office (MCPO) nga naglakip na kang Senior Superintendent Noel Gillamac.

Si Gillamac nga maoy kasamtangang officer -in –charge (OIC) sa MCPO   maoy nag-una sa listahan sa mga ngalan sa mga opisyal sa kapolisan nga maoy pilian ni Mayor Cortes aron maoy himoong permamenteng   hepe sa MCPO.

Kauban ni Gillamac nga kapilian sa mayor mao sila si Senior Supt. Edward Caranza, Senior Supt. Ernesto Agas ug Senior Supt. Joey Sanado.

Hinuon si Mayor Cortes dihang nahinabi sa mga tigbalita mibutyag nga natagbaw siya sa kasamtangang pagdumala ni Gillamac sa MCPO sanglit ang mga nahitabong mga krimen sa Mandaue dali mang nasulbad.

Pipila niini mao ang mga kaso sa pagpamusil, pangilad, tulis bangko, panglungkab ug uban pa.

Hinuon wala pa siya moprangka kun si kinsa ang iyang pilion sa mga girekomendar kaniyang mga opisyal. – BANAT NEWS