Broker mihimakak pagpatay sa head guard

CEBU, Philippines - Hugtanong gipanghimakak sa custom broker nga si Bensing Reguindin ang pasangil nga siya maoy nagpapatay sa head guard sa ilang subdivision nga si Rolly Rodrigo, 47, diha sa highway sa South Road Property habig nga bahin sa Lawaan, dakbayan sa Talisay niadtong milabay’ng Miyerkules sa buntag.

Si Reguindin uban sa iyang duha ka mga abogado mipatawag og press conference kagahapon diha sa dakbayan sa Mandaue ug mipadayag nga ang tanang pasangil walay igong basehanan ug nakahasol dili lang kaniya kondili lakip na sa iyang pamilya.

Gitataw niya nga ang kabangian tali sa ilang asosasyon sa mga molupyo sa Alpha Executive Homes batok sa developer aduna nay mga lakang nga ilang gihimo aron masulbad kini ug wala na kinahanglana pang aduna pay kutloan sa kinabuhi.

Si Reguindin nagpaabot pa sa kapolisan kun imbitaron siya kabahin sa maong kaso sanglit tinguha niya nga malimpiyohan ang iyang pangalan.

Matud pa niya nga dihang nahitabo ang pagpusil patay kang Rodrigo didto siya sa Dumaguete diin siya midawat og pasidungog gikan sa Bureau of Customs tungod sa iyang kalampusan isip broker.

Si Supt. Henry Biñas sa pakighinabi niini sa Banat News kagahapon nagkanayon nga ilang imbitahon alang sa mga imbestigasyon si Reguindin tungod sa alegasyon sa banay’ng Rodrigo nga kini maoy mi-hire og tawo aron ipapatay ang biktima. Ang homeowners diha sa Alpha Executive Homes nabahin kini sa duha ka grupo kinsa si Reguindin maoy presidente sa usa ka grupo.

Matud ni Biñas nga consistent ang pamilya ni Rodrigo sa ilang mga pasangil batok kang Reguindin apan nagkinahanglan pa sila niini og mga lig-ong ebidensiya.

Apan matud usab ni Biñas nga gipaladman pa nila ang imbestigasyon ug wala nila isalikway ang uban pang mga anggulo nga dunay laing mga nakaaway si Rodrigo. - Romeo Limpangog ug Brenda Batuto (BANAT NEWS)