CEBU, Philippines - Milagrong naluwas human molayat sa Marcelo Fernan Bridge ang usa ka gituhuang dunay deperensiya sa pangisip niadtong milabay’ng hapon dihang nakaplagan sa mga sakop sa PNP Maritime Group sa Mactan Channel.
Ang milayat mao si Robinson Paquibot, 33, residente sa Mantawi Road sa barangay Poblacion dakbayan sa Lapulapu usa ka mangayohay og sapatos.
Base sa imbestigasyon sa kapolisan sa Station 5 sa MCPO mga alas 4:30 sa milabay’ng hapon ilang nadawat ang alarma gikan sa mga sakop sa PNP Maritime Command nga dunay tawo nga milayat sa maong taytayan.
Matud pa nga gibana-banang kapin sa 50 ka tiil paubos ang gilayat ni Paquibot ug mitugpa sa dagat. Maayo nalang nga nasigpatan kini sa mga sakop sa kapolisan ug daling gipangita.
Dangtan pipila ka oras nasigpatan kini nga wala nay panimuot maong gidala kini dayon sa tambalanan.
Sumala pa nga nakaangkon og mga bun-og sa lawas ug mga pangos si Paquibot bunga sa pagkahapla pagkatagak sa dagat.
Ang mga kabanay ni Paquibot mibutyag sa kapolisan nga ang amahan niini milayat usab sa maong taytayan sa milabay’ng tuig ug maoy gituohang hinungdan nga nagkadeperensiya kini sa pangisip human magka-nervous breakdown. - BANAT NEWS