Iti nga giapod sa Kapitolyo maoy ugat sa tipos?

CEBU, Philippines - Nagduda si Bise-Gob. Gregorio Sanchez, Jr. nga ang mga iti sa manok nga gipang-apod-apod sa Kapitolyo sa mga mag-uuma ang hinungdan sa pagkuyanap sa sakit nga tipos sa lungsod sa Alegria. Hinungdan nga giawhag ni Sanchez ang buhatan ni Gob. Gwendolyn Garcia sa pagsusi sa tinud-anay nga hinungdan sa sakit tungod kay daghan siyang nakuhang kasayuran sa internet nga nagbutyag nga ang kagaw sa iti sa manok usa sa makahatag og sakit nga tipos sa mga tawo.

Makuha lang kini kun masagol sa tinubdan sa tubig nga mainom sa katawhan.

“Ayaw gyud na ninyo gamita kay delikado gyud na,” awhag ni Sanchez sa mga mag-uuma.

Apan sa iyang bahin si Capitol consultant Rory Jon Sepulveda nipakagamay sa pasangil ni Sanchez ug mihulagway sa pamahayag ni Sanchez nga gusto lang kini nga mabalhin ang atensiyon sa mga mag-uuma sa iyang negosyo nga abuno sa tanom. Nasayran nga nang-apod-apod ang Kapitolyo og iti sa manok nga libre sa mga mag-uuma nga kusganong gisaway ni Sanchez gumikan sa dautang epekto niini ngadto sa tanum.

Buot si Sanchez nga sagupon sa mga mag-uuma ang organic nga abuno. Susamang hinungdan ang gidudahan ni Sanchez sa pagkuyanap usab sa sakit nga suka-kalibang sa pipila ka barangay sa dakbayan sa Danao.

Sa pagkakaron nadugangan ang gidaghanon sa mga natakbuyan sa maong sakit sa Alegria ug gidoble na usab gikan sa duha ka kilong chlorine gihimo na kining lima ka kilo diha sa tinubdan sa tubig sa barangay Poblacion ug Santa Filomena.  - BANAT NEWS