CEBU, Philippines - Gipadayag ni kapitan Eliodoro Sanchez sa Barangay Busay ning dakbayan sa Sugbo nga wala siya mahiubos sa mga kapitan partikular na sa mga kaalyado sa Bando Osmeña Pundok Kauswagan nga wala mosuporta kaniya sa piniliay sa Association of Barangay Council (ABC) sa miaging adlaw.
Sa maong piniliay si Kapitan Michael Ralota sa barangay T. Padilla maoy midaog human kini iendorsar ni Kongresista Tomas Osmeña nga maoy pangulo sa BOPK.
“Kasagaran gyud sa mga kapitan nga misaad nga mosuporta nako, namalhin ngadto sa pikas sukad giindorsar ni Congressman Osmeña si Ralota,” nagkanayon si Sanchez
Hinuon gitataw niya nga bisan pa man sa maong hitabo , magpabilin siya sa tugkaran sa BOPK gumikan kay ang pagsalmot niya sa eleksyon sa ABC, parte lang sa demokrasya ug dili personal.
Dugang pa niya nga mosuporta gihapon siya sa administrasyon ni Ralota ug iyang gisaad nga ang 18 ka mga kapitan nga misuporta kaniya sa eleksyon sa ABC iyang agnihon nga mokooperar sa mga kalihukan sa ABC.
Samtang si Ralota sa dihang nahinabi sa Banat News, mihangop ug nagpasalamat kang Sanchez sa gisaad niini nga mosuporta sa iyang administrasyon. - BANAT NEWS