Gibalibali'g sagpa ni ma'm

Gipasakaan og kasong kriminal sa Provincial Prosecutors Office ang usa ka magtutudlo sa grade 5 sa San Remegio Central School sa lungsod sa San Remegio human gipasanginlang mibali-bali og sagpa sa nawong sa iyang tinun-an dihang nasuko kini nga natulog ang maong bata samtang siya nagklase.

Ang maestra (pangalan gipugngan hangtud di makuhaan og habig) gipasakaan og kasong kalapasan sa Akta Republika 7610 human mopasaka og kaso ang inahan sa biktima nga si Eliza Demecillo Lapesiros, 46, molupyo sa sitio Calcalan barangay Poblacion.

Matud pa sa reklamo nga gibalibali og tamparos sa maong maestra ang nawong sa iyang anak niadtong petsa 6 sa bulan sa Septiyembre.

Matud pa sa inahan natingala nalang siya nga pag-uli sa iyang anak nga naghilak alas 5:30 sa hapon ug dihang iyang gipangutana gitug-anan siya niini nga gisagpa kini sa maestra mga alas 11:00 pasado sa buntag atol sa ilang Hekasi nga subject.

Ang maong panghitabo nakahatag usab og trauma sa bata ug mahadlok na nga motungha human sa hitabo.

Nianang pagkasunod adlaw giadto niya sa tunghaan aron magpakisusi apan naka-leave na ang maong magtutudlo hinungdan nga midangop siya sa buhatan sa kapulisan aron sa pagpa-blotter ug gitambagan siya nga magpakurasyon.

Base sa medical certificate nga gipirmahan ni Dr. Edgar Espinosa ang municipal health officer sa lungsod nga penetsahan og Septiyembre 8 adunay injuries nga nakita ang maong doktor.

Nunot niini ang imbestigador sa Women’s Desk sa San Remegio Police nga si PO1 Morena Montanez mirekomendar sa pagpasaka og kasong kriminal batok sa maong magtutudlo. Ang kaso giduso sa provincial prosecutors office niadtong petsa 19 sa bulan sa Nobiyembre human walay sabot sabot nga nakab-ot.

Apil sa gihatagan og kopya sa maong reklamo sa pamilyang Lapesiros mao ang Ombudsman for the Visayas ingon man ang Department of Education. – BANAT NEWS