CEBU, Philippines - Gitug-an ni Integrated Provincial Health Officer, Dr. Cristina Giango nga misaka pa ang gidaghanon sa kaso sa sakit nga typhoid fever kon tipos gikan sa duha ka mga barangay didto sa lungsod sa Alegria.
Apan giklaro ni Giango nga natumbok nila nga tipos kini tungod kay daghang pasyente ang positibo sa typhoid base sa ilang gipahigayon nga testing.
Hinuon iyang gitataw nga nakontrolar na sa kagamhanan ang maong matang sa sakit tungod kay aduna nay gipadalang mga medisina ug gihimoan na usab og aksyon ang tinubdan niini.
Matud pa ni Giango nga niadtong nakalabay nga adlaw miabot gyud sa 185 ka mga pasyente ang miduol sa mga hospital tungod sa pagkasakit sa tiyan ug hilanat ug nanga-admit.
Apan kagahapon napun-an ang gidaghanon sa mga biktima dihang nangabot na ang dugang medical team nga misusi sa kadako sa kadaut sa maong sakit.
Si Giango dili pa hinuon makatumbok kun alarming na ang gidaghanon sa kaso sa typhoid.Wala pa usab nila masuta kun angayan bang ideklarar nga outbreak.
Gisusi na sa taga provincial health office ang water system sa lungsod ug ingon man ang tinubdan sa pagkaon sa mga nabiktima.
Mitambag si Giango ngadto sa mga nagdumala og water system sa usa ka lugar nga monitoron pag-ayo ang ilang chlorinator nga dili matakbuyan og kagaw ilabi na nga nagpunay og ulan-ulan.
Samtang giawhag usab niini ang katawhan nga dili magpataka og inom og tubig ug ingon man sa pagkaon aron makalikay kini sa mga sakit sama sa tipos ug diarrhea. - BANAT NEWS