Mga balay natabuna'g lapok, yuta

CEBU, Philippines - Mokabat ngadto sa 12 ka pamilya ang naapektohan sa nahitabong pagdahili sa yuta niadtong milabay’ng adlaw diha sa sitio Buli, barangay Mayana, dakbayan sa Naga.

Si Mayor Valdemar Chiong nga nahinabi sa Banat News kagahapon miingon nga niadtong Martes pa sa alas 5:00 sa hapon nagsugod sa pagdahili ang yuta diha sa lugar tungod sa uwan.

Ang mga apektadong pamilya temporaryong gipahimutang sa Mayana Elementary School.

Gihulagway ni Chiong nga ang Mayana usa ka bukirang barangay sa Naga diin duna kini gilay-ong 20 kilometros gikan sa Poblacion.

Matud ni Chiong nga mihatag na sila og mga bugas ug de lata ug gikatakdang mohatag usab og pinansiyal nga hinabang ngadto sa mga pamilyang naapektohan aron magamit sa pagpatukod og balik sa ilang mga balay.

Apan giklaro ni Chiong nga dili na niya tugotan pang makatukod og balik ang mga pamilyang naapektahan nga motukod og balik sa daan nilang gitarukan sa ilang mga balay aron malikayan ang disgrasya.

Si Chiong midugang nga dunay lapad nga luna diha sa barangay Mayana nga gitagana aron maoy butangan sa mga apektadong pamilya.

Kahinumduman nga niadtong milabay’ng mga tuig dunay mga pamilya usab nga naapektohan sa pagdahili sa yuta sa barangay Balirong tungod usab sa sunod-sunod nga pagbunok sa uwan ug sa pag-awas sa sapa sa ibabaw’ng bahin sa lugar.  – BANAT NEWS