Head guard gitumba!

CEBU, Philippines - Patay na nga nadangat sa tambalanan ang usa ka 47-anyos nga head guard sa Alfa Executive Homes sa barangay Lawaan III, dakbayan sa Talisay human kini pusila sa wala mailhing lalaki kagahapon sa buntag diha sa national road sa barangay Lawaan I sa nahisgutang siyudad.

Ang biktima mao si Rolly Rodrigo nagpuyo diha sa Alfa Executive Homes nakaangkon og lima ka samad pinusilan sa iyang buko-buko diin ang mga bala milahos ngadto sa iyang dughan wala na makaabot nga buhi ngadto sa Talisay City District Hospital.

Si Inspector Hugo Rio Ipong sa Talisay City Police Station nga nahinabi sa Banat News kagahapon nagkanayon nga si Rodrigo gikan naghatud sa iyang anak diha sa Lawaan Elementary School samtang nagbiyahe kini pauli dihang paghunong tungod sa ‘stop signal’ usa ka wala mailhing lalaki ang miduol sa biktima ug kalit siyang gipusil.

Ang biktima natumba kini uban sa iyang Rusi nga motorsiklo color green nga nagtangag sa plakang 7TG-G-65867 ug naigo usab ang habal-habal driver nga si Richard Pilotos nga iyang katapad ug natumba usab.

Ang drayber sa nahisgutang habal-habal mibutyag sa Banat News nga pareho sila og direksiyon ni Rodrigo nag-atubang paingon ngadto sa dakbayan sa Sugbo.

Matud pa ni Pilotos nga nakita niya ang usa ka lalaki kinsa nag-angkas og motorsiklo ug ang drayber niini mihunong diha sa daplin sa karsada nga ilang nahimutangan.

Ang nahisgutang angkas mikanaog gikan sa motor ug miduol dapit sa likod ni Rodrigo dayon pusil niini ug human niini mibalik kini og sakay sa motorsiklo ug mipadagan paingon ngadto sa Cebu South Coastal Road.

Ang pamilya ni Rodrigo nga nahinabi kagahapon sa DyAB mibutyag nga niadtong buwan sa Mayo niining tuiga usa ka negosyante ang gikabangi sa biktima. Ang pamilya ni Rodrigo mipasangil nga ang maong negosyante kaniadto misuhol og tawo aron patyon ang biktima kini nahitabo niadtong milabay’ng national elections apan ang maong tawo miuli sa kwarta ngadto sa maong negosyante tungod kay dili siya makaako og patay sa biktima kay iyaha kining higala ug gitug-anan sa maong tawo ang biktima kabahin sa buot mahitabo sa maong negosyante.

Ang maong negosyante (pangalan gipugngan samtang wala pay kasong gipasaka) nga nahinabi sa Banat News kagahapon sa iyang cellular phone mihimakak sa maong pasangil batok kaniya apan kini miangkong gikalalis niini kaniadto si Rodrigo tungod kay ang ubang mga residente diha sa ilang subdivision dili ablihan sa gwardiya sa gate ug ingnon nga wala makabayad sa monthly dues hinungdan nga iyaha (negosyante) gibadlong nga misangpot sa lalis.

Gibutyag usab niini nga ang homeowners diha sa ilang subdivision nabahin sa duha ka grupo diin sa usa ka grupo siya maoy presidente.

Matud usab niini nga wala sila makauyon sa pamaagi sa presidente sa pikas grupo ug gani duna silay gidusong reklamo batok niini ngadto sa Home Land Use Regulatory Board.

Ang maong negosyante midugang nga unya na sila mobayad sa ilang monthly dues kung mahusay na ang tanan nilang mga reklamo ngadto sa buhatan nga hingtungdan.

Sa laing bahin, si Supt. Henry Biñas, hepe sa Talisay City Police Station nagkanayon nga wala nila isalikway ang kabahin sa bangi diha sa subdivision nga usa sa motibo sa pagpusil patay sa biktima apan gisubay usab nila ang laing anggulo tungod kay posibleng dunay laing nakabangi si Rodrigo.

Ang kapolisan mipahigayon og hot pursuit operation batok sa kriminal. – BANAT NEWS