Kasadya sa Plaza ilusad

CEBU, Philippines - Samtang nagpadayon ang pagpanindot sa Plaza Independencia,   buksan karong Disyembre 11 ang “Kasadya sa Plaza 2010” nga dumalahon sa kagamhanan sa Dakbayan sa Sugbo ug Junior Chamber International –Metro Cebu Uptown.

Usa ka fireworks display ang giandam alang niini uban usab sa mga pasundayag sa sikat nga mga banda sa siyudad.

Ang maong kalihukan magpadayon hangtud na sa kapistahan ni Sr. Sto Niño karong Enero sa sunod tuig.

Matud pa ni Mayor Michael Rama nga panahon na kini   nga himoong sadya ang Plaza kay usa usab kini sa pamaagi nga makadani og turista nga mobisita sa maong dapit.

Gawas sa matag gabii nga kalingawan, butangan usab ang maong lugar og Christmas Bazaar ug mohimo usab sila og dance ug band competition matag semana aron ma-expose ang talento sa mga kabatan-onan sa siyudad partikular na sa natad sa pagsayaw.  

Ang makadaug sa mga kompetisyon ipadala ngadto sa kaulohan aron itigi sa ubang grupo nga maggikan sa nagkalain-laing dapit sa nasud.

Gawas niini, sa Plaza usab ipahigayon ang Parol ug Belen making contest nga salmotan sa nagkadaiyang barangay ug organisasyon nga nagbase ning dakbayan sa Sugbo.

Ang tinubdan sa ilang premyo adto maggikan sa koleksyon sa mga abangan sa mga stalls sa gihimo alang sa Christmas Bazaar. – BANAT NEWS