Vote buying sa SK gihimakak

CEBU, Philippines - Hugtanong gipanghimakak ni manlalaban Francisco Amit, ang legal consultant ni Mayor Jonas Cortes ang mga pasangil bahin sa giingong   vote buying   sa miaging eleksyon sa presidente sa federasyon sa Sangguniang Kabataan (SK) sa miaging adlaw.

Gani gumikan sa giingong pinalitay sa boto, midaog si Michael Cuizon sa barangay Alang-Alang, kinsa pag-umangkon ni Amit.

Si Amit miingon nga adunay plano ang kagamhanan nga manghatag og laptop sa mga SK chairman apan ipatuman kini subay sa tukmang proseso.

Dugang pa niya nga ang kaatbang ni Cuizon nga si Gerico Dinsay mahimong moduso og petisyon ngadto sa Comelec kun nagduda man siya nga napildi siya gumikan kay namalit og boto ang iyang kaatbang.

Gipanghimakak usab ni Amit   ang pasangil nga sa milabay’ng piniliay may mibayad og P25 ,000 sa mga botanteng SK sa pagsiguro sa kadaugan ni Cuizon.

Si Amit miingon ang mga laptop mahimong gamiton sa personal sa mga SK sa kabarangayan sanglit gitugyan man usab kini ngadto kanila isip ilang kahimanan sa ilang pagserbisyo sa katungdanan. – BANAT NEWS