CEBU, Philippines - Nadala sa tambalanan ang usa ka lalaki human kini dunggaba sa iya ra usab nga igsoon didto sa Purok 4, Barangay Sto. Niño syudad sa Toledo sa miaging gabii.
Ang biktima naila nga si Vevencio Gutang, 54, minyo, ug residente sa nahisgutang dapit, samtang ang suspetsado mao si Ludivino Gutang, 64, minyo ug maguwang sa biktima.
Sa inisyal nga imbistigasyon sa kapolisan nga gipangulohan ni SPO1 Jerry Trinidad nasayran nga nag-away kuno kining managsuon tungod lang sa punoan sa lubi.
Matud pa usab sa mga nakasaksi nga pulos nakainom ang duruha hinungdan nga gumikan sa kainit sa ulo, human magkalalis milanit sa iyang kutsilyo ug giluba ang biktima.
Maayo nalang kay nasampot ra pagkaigo ang biktima ug gidala kini dayon sa Balamban District Hospital apan wala maglangan gibalhin ra usab kini sa tambalan sa dakbayan sa Sugbo.
Ang suspetsado boluntaryo hinuong mitahan sa iyang kaugalingon ngadto sa kapolisan sa Toledo aron manubag sa iyang nabuhat nga krimen.
Kasamtangan karong nagtingkagol sa Toledo Police Station ang suspetsado. – BANAT NEWS