Mangunguot nasakpan gibun-og

CEBU, Philippines - Nabun-og ang usa ka lalaki human kini tabangi og kulata sa mga tawo kinsa nakasakop kaniya nga nanguot sa mga pasahero sa usa ka PUJ didto sa dalan MJ Cuenco Avenue, barangay T. Padilla, ning dakbayan sa Sugbo sa miaging gabii.

Ang suspetsado nailhan nga si Alex Palermo, 42, taga barangay Yati lungsod sa Lilo-an.

Ang iyang mga biktima mao sila si Dinah Pilapil, 32 ug ang ig-agaw niini nga si Godwin Pilapil, 21, pulos taga barangay Tinago ning siyudad.

Ang mga biktima misumbong sa kapolisan, nga samtang nagsakay sila sa maong pasaheroang jeep, hinay-hinay nga gikuot ni Palermo ang bag ni Pilapil nga may sud nga pitaka, ug may cash nga P1,000 , ATM card ug mga mahinungdanong papeles.

Maayo nalang gani kay nabantayan dayon kini sa iyang ig-agaw hinungdan nga misinggit kini ug ang suspetsado dali usab dayong mi-ambak gikan sa jeep.

Unya misuway kini og sakay sa laing PUJ aron pag-eskapo, apan nadakpan siya sa mga molupyo sa maong dapit ug gitabangan siya og kulata.

Dali usab nga miresponde ang mga barangay tanod nga sila si Jerome Lim ug si Manuel Hernani sa barangay Tejero, kinsa maoy mi-turn-over sa suspek ngadto sa kapolisan.

Matud ni SPO3 Rene Cerna sa Waterfront Police Station, nga posibleng naggamit og gidiling druga ang suspetsado tungod kay nasakmitan nila kini og   usa ka marijuana stick.

 Kasong paglapas sa Article 2, Republic Act 6195, o Dangerous Drug Act ang atubangon sa maong suspetsado kinsa nagtingkagol na karon sa prisohan. - Reina Vita Labang CIT ug Maria Ana Carmela Estenor (BANAT NEWS)