Naglaom nga may milagro

CEBU, Philippines - Naglaom nga adunay mahitabong ‘milagro’ si Busay barangay Kapitan Eliodoro “Yody” Sanchez aron modaog ang iyang lineup alang sa pagka-presidente sa Association of Barangay Council atol sa eleksyon karung buntag.

Si Sanchez makig-atbang kang T. Padilla barangay Kapitan Michael Ralota nga maoy giendorso sa ilang labaw sa Bando Osmeña Pundok Kauswagan nga si Kong. Tomas Osmeña.

Matud pa ni Sanchez dihang gihinabi sa DyDD dako og kahigayunang maengganyo ang mga kapitan o ba kaha maempluwensyahan ang ilang huna- huna tungod sa endorsement ni Osmeña.

Apan matud ni Sanchez nga mipugos siya sa iyang kandidatura uban sa iyang kompletong lineup gumikan kay nagtuo pa siya nga dunay mahitabung milagro.

Ang modaug pagka ABC president sa eleksyon nga sugdan karung alas 9:00 sa buntag maoy mohulip ni outgoing ABC president Eugenio Faelnar.

Dugang pa niini nga dunay pipila ka mga konsehal sa dakbayan ang miawhag kaniya nga mosibog nalang sa kandidatura. (BANATNEWS)