Shootout, polis naangol, 2 suspek dakpan angol sab

CEBU, Philippines - Usa ka polis ang nasamdan samtang duha ka mga suspek ang nangalandig gihapon sa tambalanan human sa nahitabong shootout kagahapon sa kaadlawon diha sa S. Osmeña Street sa may Pier 4 dakbayan sa Sugbu.

Ang samdan sa tuong abaga ug tuong kilid sa lawas mao si PO2 Sir Abatayo, 35, taga sitio Cahipa sa barangay Hipodromo ug sakop sa Mobile Patrol Group.

Samtang nasamdan usab human mapusili si Daryl Nimrod Baton,19, taga sitio Catadman barangay Sabang dakbayan sa Danao ug 2nd year college sa usa ka inilang unibersidad dinhi sa dakbayan.

Nadakpan usab sa hot pursuit operation si Aljun Bardun taga sitio Catadman, barangay Sabang dakbayan sa Danao kinsa diha maabti sa Danao District Hospital nga nagpatambal tungod sa mga pangos sa nawong ug sa lawas samtang gipangita pa ang ikatulong suspek nga giilang si Miguel Andrino, 21, alias Sindoy nga taga Pandan, Sibonga

Sa imbestigasyon sa Homicide Section sa Cebu City Police Office (CCPO) si Abatayo luwan sa patrol car 015 nga gimaneho ni PO1 Munick Cabañero diha sa nahisgutang lugar naalarma sa paglabay sa usa ka motorsiklong walay plaka nga gisakyan sa tulo ka lalaki.

Tungod niini ilaha kining gisita ug gipahunong, apan wala pa gani makakanaog si PO2 Abatayo sa patrol car giunhan sila pagpusil hinungdan nga naigo si Abatayo.

Bisan samaron nakabawos si Abatayo pagpusil ug naigo sa tuhod si Baton hinungdan nga kini nahagbong. Tungod niini gigukod ni Cabañero ang motorsiklo ug dihang nakaduol gidasmagan kini hinungdan sa pagkatumba sa duha.

Apan nakabarog gihapon ang duha ug mipasutoy padulong sa amihanan samtang si Cabañero mitabang kang Abatayo ug mitawag og backup ug gidala usab si Baton sa Cebu City Medical Center.

Sa hot pursuit operation sa grupo ni Supt. Armando Radoc, hepe sa MPG ilang nadakpan si Bardun sa Danao District Hospital ug nakuha usab ang motorsiklo.

Gitumbok sa duha nga si Andrino kinsa nakaikyas maoy kalit namusil sa mga polis.

Si SPO2 Roger Nedamo nga nahinabi sa Banat News gikan nag-inom sa may Mango Avenue ang tulo ug paingon na kining mamauli subay sa Pier 4 niadtong higayona dihang nasigpatan sa mga polis.

Nakuha sa crime scene ang usa ka .357 revolver nga dunay lima ka kabhang ug usa ka buhing bala nga gituohang gilabay human sa hitabo, samtang nabuslot ang windshield, hood, bumper ug tuong kilid sa patrol car nga naigo sa bala atol sa pinusilay (BANATNEWS)