Gidunggab sa liso'g pangisip

CEBU, Philippines - Samdan ang usa ka lalaki human kini dunggaba sa bayaw niyang liso og pangisip didto sa barangay Jugan , lungsod sa Consolacion sa miaging hapon.

Ang biktima giila nga si Jimmy Sansan, hingkod, nga taga Jugan, samtang ang suspetsado mao si Ruben Judaya, 52, kinsa giingong liso og pangisip o wala sa hustong panghunahuna ug silingan ra usab sa biktima.

Nasayran nga ang biktima diha ra sa ilang balay dihang sa walay igong hinungdan kalit lamang kining giduol sa suspetsado samtang nagtalikod ug gihansakan dayon ang buko-buko sa iyang kutsilyo.

Gisundan pa og laing mga dunggab, ug gipanagang kini sa biktima nga maoy hinungdan nga nasamad usab kini sa bukton.

Samtang si Teresita Judaya nga asawa sa suspetsado miangkon nga adunay nervous breakdown ang iyang bana ug ikaduha na kining higayon nga gi -atake kini sa maong balatian.

 Hinuon gipasaylo ra kini sa biktima kay bana man kini sa iyang igsoon.

Ang biktima gihatod dayon ngadto sa tambalanan samtang ang suspetsado gitakda usab nga dad-on sa rehabilitation center aron kini maulian sa iyang sakit. (BANATNEWS)