CEBU, Philippines - Naangol ang duha ka managsoon dihang kalit lang nga gipamusil sa ilang silingan didto sa sitio Canumay, barangay Labogon, dakbayan sa Mandaue sa miaging gabii.
Ang mga biktima mao sila si Ricardo Pagatpat, 36, ug Raymond Pagatpat, 27 nga pulos minyo, samtang ang suspetsado mao usab si Ricardo Arnoco, hingkod , nga managsilingan sa sitio Canumay.
Si SPO1 Edgardo Pasaylo sa kapolisan sa Presinto 3 sa Basak Police Station nga nahinabi sa Banat News mibutyag nga naglingkod lang sa lantay nga kawayan ang managsoon nga nagkukabildo dihang kalit lang mitumaw ang suspetsado nga masuk-anon.
Kini tungod sa giingong gipasakang kaso sa mga biktima batok kaniya ug didto magsugod ang panaglalis nila.
Unya miuli sa ilang balay ang suspetsado apan sa pagbalik niini nagdala na og armas dayon gipamusil ang mga biktima.
Ang mga biktima kinsa nakabaton og samad pinusilan sa ilang kalawasan gihatod dayon ngadto sa Mandaue City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.
Samtang gipangita pa sa kapolisan ang suspetsado human kini mosibat. (BANATNEWS)