Panagtabla sa botos nakapabuhi sa oposisyon

CEBU, Philippines - Si Konsehal Val Ylanan sa oposisyon sa dakbayan sa Talisay nagkanayon nga angayang pauswagon o palambuon sa administrasyon ang ilang pamunoan sa siyudad.

Si Ylanan miingon sa maong awhag human sa nahitabong eleksiyon sa Sangguniang Kabataan Federation niadtong Biyernes sa buntag diin ang anak nga si Val Joseph gidaog lang pinaagi sa pag-antog sa sensilyo ni Carmel John Burlas.

Matud sa konsehal nga sa gipakitang resulta sa botohay sa duha nga diin nagtabla og tag-onse ka botos usa kini ka timaan nga dunay daghang gusto og kausaban.

Si Ylanan nangangkon nga wala mapildi ang iyang anak sa maong sitwasyon tungod kay patas man kini og botos nga nakuha batok kang Burlas.

Sa wala pa ang maong eleksiyon ang grupo sa administrasyon nangangkon kaniadto nga 12 ka mga SK chairman ang kaalyado sa administrasyon.

Ang konsehal sa siyudad nagkanayon usab nga unang higayon sa kasaysayan sa Talisay nga nahitabong nagkaperahas og botos ang oposisyon ug administrasyon.

Samtang susihon ni Ylanan kun nahasubay ba sa balaod o patakaran ang gihimong ‘toss coin’ nga maoy napildihan sa iyang anak tungod kay kun aduna siya’y makitang kahiwian moduso sila og protesta.

Si Ylanan mikwestiyon usab kabahin sa wala pagpasulod sa mga sakop sa media niadtong SKF election.

Ang kaalyado sa administrasyon maoy giingong diha sa sulod sa Peoples Hall sa city hall diin gipahigayon ang eleksiyon ug walay bisan usa nga kaalyado sa oposisyon nga diha sa sulod.

Apan kahinumduman nga si Bertillo Pasilang, Department of Interior and Local Government Office sa siyudad mipasabot nga base sa memorandum circular nga representative sa religious sector, academe ug hepe sa kapolisan lang ang gitugotang mahimong panel of observer. (BANATNEWS)