Nadasmagan, naguroy

CEBU, Philippines - Patay ang usa ka lalaki human maligsi dayon naguyod sa naghaguros nga sakyanan sa Airport Road sa barangay Pusok, dakbayan sa Lapulapu alas-5 pasado ang takna kagahapon sa buntag.

Ang biktima mao si Jolito Jakosalem Hernandez, 28, taga Riverside, barangay Canduman, dakbayan sa Mandaue.

Ang nakadasmag ug nakaguroy kaniya nga sakyanan mao ang usa ka pribadong sakyanan nga may plakang YHW-478 nga gimaneho ni Adonis Mondedo Abing, 32, taga Sac 1, barangay Buaya sa dakbayan sa Lapulapu.

Si SPO1 Joselito Ruel Nalzaro, imbestigador sa traffic division sa Lapulapu Police Office (LLPO) nga gikahinabi sa Banat News miingon nga milabang ang biktima sa dalan sa maong lugar dihang nadasmagan ni Abing.

Gumikan sa kakusog sa impact napasok ang biktima sa ilawom ug nalatayan sa mga ligid ang lawas naguyod pa og pipila ka metros gikan sa gikabanggaan niini una pa hingpit nakahunong ang sakyanan.

Sumala pa nga ang biktima giingong nagsabot sa iyang asawa nga mag-abot sa usa ka establisamento sa maong dapit aron unta magdungan og panimba tungod kay adlaw sa ilang anak.

Ang biktima nakaangkon og grabeng kadaut sa kalawasan nga nakaingon sa hinanali niining kamatayon. Ang biktima gidala pa unta sa Lapulapu District Hospital apan gideklarar kini nga dead on arrival.

Ang suspetsadong drayber nga nakaligis mitahan usab sa kapolisan ug gibalhog sa sulod sa karsel samtang giandam na ang kasong ipasaka nga reckless imprudence resulting to homicide. (BANATNEWS)