CEBU, Philippines - Gipanghingusgan ni Konsehal Alvin Dizon sa dakbayan sa Sugbo ang pagduso sa resolusyon nga nagsuporta sa awhag sa Department of Labor and Employment (DOLE) sa mga employer nga mohatag sa ilang mga empleyado sa 13th month pay atol o sa dili pa moabot ang Disyembre 24 matag tuig.
Kini makita sa Department Advisory No. 03, series of 2010, citing Section 8 of Presidential Decree 851 nga giluwat sa DOLE nga nagpasabot sa mga amo nga kinahanglang ang ilang mga empleyado hatagan og katunga sa ilang 13th month pay sa katapusang buwan sa tuig.
Kini tungod kay ang unang katunga niini, ihatag man sa buwan sa Hunyo matag tuig, base sa maong balaod.
“Dunay katungod ang atong mga trabahante nga makadawat og 13th month pay atol o sa dili pa moabot ang December 24. Ubos sa resolusyon nga akong gipalabang sa konseho, akong gi-awhag ang Department of Labor and Employment nga i-monitor ang pagpatuman sa maong balaod,” matud pa ni konsehal Dizon sa dihang nahinabi sa Banat News.
Ang maong resolusyon naaprobahan niadtong Biyernes sa buntag atol sa regular nga sesyon sa City Council .
Samtang ang mga amo mahimong mohatag sa ilang mga empleyado sa katunga sa ilahang 13th month pay sa unang katunga sa tuig , ug ang laing katunga pwede nga ihatag inig ka Disyembre. Kini nagdepende sa kasabotan tali sa empleyado ug sa iyang amo ug wala’y labot niini ang Christmas bonus.
Ang tanan nga mga employer gikinahanglan nga mohimo og report bahin sa ilang pagtuman ning maong balaod ngadto sa labing duol nga regional labor office sa ilang lugar dili pa moabot ang Enero 15 sa matag tuig. (BANAT NEWS)